चंद्रशेखर चंद्रशेखर चंद्रशेखर

चंद्रशेखर चंद्रशेखर चंद्रशेखर पाहि माम् । चंद्रशेखर चंद्रशेखर चंद्रशेखर रक्ष माम् ॥धृ॥ रत्नसानुशरासनं रजताद्रिशृंगनिकेतनं , सिंजिनीकृतपन्नगेश्वरमच्युतानलसायकम् । क्षिप्रदग्धपुरत्रयं त्रिदिवालयैरभिवंदितं , चंद्रशेखरमाश्रये मम् किं करिष्यति वै यमः ॥1॥ पंचपादपपुष्पगंधपदांबुजद्वय शोभितं , भाललोचन जातपावकदग्धमन्मथविग्रहम् । भस्मदिग्धकलेवरं भवनाशनं भवमव्ययं , चंद्रशेखरमाश्रये मम् किं करिष्यति वै यमः ॥2॥ मत्तवारणमुख्यचर्मकृतोत्तरीय मनोहरं , पंकजासन पद्मलोचन पूजितांघ्रिसरोरूहम् । देवसिंधु तरंगसिकरसिक्तशुभ्रजटाधरं , चंद्रशेखरमाश्रये मम् किं करिष्यति वै यमः ॥3॥ यक्षराजसखं भगाक्षहरं भुजंगविभूषणं , शैलराजसुतापरिष्कृतचारुवामकलेवरम् । क्ष्वेडनीलगलं परश्वधधारिणं मृगधारिणं , चंद्रशेखरमाश्रये मम् किं करिष्यति वै यमः ॥4॥ कुण्डलीकृतकुण्डलेश्वर कुण्डलं वृषवाहनं , नारदादिमुनीश्वरस्तुतवैभवं भुवनेश्वरम् । अंधकांतकमाश्रितामरपादपं शमनांतकं , चंद्रशेखरमाश्रये मम् किं करिष्यति वै यमः ॥5॥ भेषजं भवरोगिणामखिलापदामपहारिणं , दक्षयज्ञविनाशकं त्रिगुणात्मकं त्रिविलोचनम् । भुक्तिमुक्तिफलप्रदं सकलाधसंघनिबर्हणं , चंद्रशेखरमाश्रये मम् किं करिष्यति वै यमः ॥6॥ भक्तवत्सलमर्चितं निधिमक्षयं हरिदम्बरं , सर्वभूतपतिं परात्परमप्रमेयमनुत्तमम् । भूमिवारिनभो हुताशन सोमपालित स्वाकृतीं , चंद्रशेखरमाश्रये मम् किं करिष्यति वै यमः ॥7॥ विश्वसृष्टीविधायनं पुनरेव पालनतत्परं , संहरन्तमपि प्रपंचमशेषलोकनिवासिनम् । क्रीडयन्तमहर्निशं गणनाथयूथसमन्वितं , चंद्रशेखरमाश्रये मम् किं करिष्यति वै यमः ॥8॥ मृत्युभीतमृकण्डुसूनू कृतस्तवं शिवसन्निधौ , यत्र कुत्र च यः पठेन्नहि तस्य मृत्युभयं भवेत् । पूर्णमायुररोगितामखिलार्थसंपदमादरं , चंद्रशेखर एवं तस्य ददाति मुक्तिमयत्नतः ॥9॥